Yr Urdd yw’r mudiad ieuenctid mwyaf yng Nghymru gyda mwy na 50,000 o aelodau. Mae Chwaraeon Cymru wedi gweithio mewn partneriaeth â’r Urdd ers nifer o flynyddoedd ar ei raglen chwaraeon cymunedol. Mae wedi cael canlyniadau rhagorol ac wedi tynnu sylw at y galw cynyddol am ddarparu cyfleoedd chwaraeon drwy gyfrwng y Gymraeg.
Yng ngoleuni hyn, a gyda lansiad diweddar Strategaeth Chwaraeon Cymunedol y sector, sydd ag amcan o gael pob plentyn i wirioni ar chwaraeon am oes, mae Chwaraeon Cymru yn credu’n gryf bod yr Urdd yn bartner arwyddocaol wrth iddo geisio cyrraedd y nod hwn. Gyda’i rwydwaith cynyddol o Swyddogion Datblygu Chwaraeon, hyfforddwyr a gwirfoddolwyr, yn ystod y flwyddyn sydd i ddod bydd cyfleoedd ar lefelau amrywiol yn cael eu cynnig ym mhob un o’r 22 awdurdod lleol ledled Cymru.
Y nod yw darparu cyfleoedd mewn amrywiaeth o chwaraeon yn yr holl grwpiau oedran. Bydd safon y sesiynau a’r clybiau’n amrywio er mwyn darparu ar gyfer pob gallu, a bydd cyswllt cynyddol â Chyrff Rheoli Cenedlaethol yn sicrhau bod cyfleoedd i blant symud ymlaen ar hyd y llwybr chwaraeon.
Mae’r targedau sydd wedi’u gosod yn uchelgeisiol iawn - 1300 o wirfoddolwyr a hyfforddwyr i sefydlu clybiau newydd a datblygu adrannau newydd mewn clybiau presennol; sefydlu 60 o glybiau newydd yn cynnig chwaraeon penodol a 68 o glybiau aml-chwaraeon newydd – a bydd y rhain i gyd ar wahân i gynnal a chadw’r clybiau presennol y ceir bron i 100 ohonynt mewn pocedi bychain ar hyd a lled Cymru. Ceir hefyd y 42,000 o blant a phobl ifanc y mae’r Urdd am eu cynnwys drwy gyfrwng ei strwythur cystadlu.
Fel y swyddog sy’n gweithio gyda’r Urdd, rydw i wedi gweld yn uniongyrchol sut mae’r Urdd yn gweithio ag ysgolion, timau datblygu chwaraeon yr awdurdodau lleol a Chyrff Rheoli Cenedlaethol er mwyn creu cyfleoedd newydd nad oedd yn bodoli o’r blaen. Mae rhai’n ystyried gwaith yr Urdd fel dyblygiad ond, gyda clybiau’n llawn a cheisiadau aml am sesiynau ychwanegol, mae’n amlwg bod galw heb ei fodloni’n bod.
Mae’r targedau sydd wedi’u gosod ar gyfer y flwyddyn sydd i ddod yn uchelgeisiol a dweud y lleiaf, ond gyda brand cryf, enw da am gyflwyno, profiad, angerdd a gwybodaeth y staff, a’r galw cynyddol am yr iaith Gymraeg, maen nhw’n siŵr o gael eu cyrraedd.
